കൃഷിവകുപ്പിൽ കാർഷിക പരിചയ - പരിശീലന പരിപാടികൾക്കായി അവസരം

കേരള കൃഷിവകുപ്പിൽ കാർഷിക പരിചയ - പരിശീലന പരിപാടികൾക്കായി അവസരമൊരുങ്ങുന്നു.സംസ്ഥാന സര്‍ക്കാരിൻ്റെ അഭിമാന പദ്ധതിയായ സുഭിക്ഷ കേരളം - സംയോജിത ഭഷ്യ സുരക്ഷാ പദ്ധതിയുടെ ഭാഗമായി വിദ്യാസമ്പന്നരായ യുവാക്കൾക്കും വിദ്യാർത്ഥികൾക്കുമായി കൃഷിവകുപ്പിൽ ആറുമാസത്തെ കാർഷിക പരിചയ - പരിശീലന പരിപാടികൾക്കായി (internship programme ) അവസരമൊരുക്കുന്നു.  

സുഭിക്ഷ കേരളം പദ്ധതിയുടെ ഭാഗമായി പരമാവധി യുവാക്കളെയും വിദ്യാർഥികളെയും കാർഷിക സംസ്കൃതി അറിയുന്നതിനും കാർഷിക വ്യവസായ മേഖലയിലെ സാധ്യതകൾ മനസ്സിലാക്കുന്നതിനുമായി കൊണ്ടുവരുന്നതിനാണ് സർക്കാർ തീരുമാനിച്ചിട്ടുള്ളത്.

കഴിഞ്ഞദിവസം ബഹുമാനപെട്ട കൃഷിവകുപ്പ് മന്ത്രി ശ്രീ. V S സുനില്‍ കുമാര്‍ തന്റെ ഔദ്യോഗിക ഫേസ്ബൂക്കിലൂടെയാണ് ഈ പദ്ധതിയെകുറിച്ചുള്ള വിവരങ്ങള്‍ പങ്കുവച്ചത്.

കൃഷി ബിരുദധാരികൾ, വിഎച്ച്എസ്ഇ സർട്ടിഫിക്കറ്റ് ഉള്ളവർ,
മാനേജ്മെൻറ് ബിരുദധാരികൾ, സോഷ്യൽവർക്ക് ബിരുദധാരികൾ, മറ്റ് ബിരുദധാരികൾ, സോഷ്യൽ വെൽഫെയർ ഡിപ്ലോമക്കാർ, മാനേജ്മെൻ്റ് ഇൻ ബിസിനസ് അഡ്മിനിസ്ട്രേഷൻ ഡിപ്ലോമക്കാർ എന്നിവർക്കെല്ലാം ഈ പരിശീലന പരിപാടിയിൽ പങ്കുചേരാം. ആറുമാസ പരിശീലന കാലയളവിൽ കർഷകരുമായി സംവദിക്കുന്നതിനും, വിളവിവരം, വിളആരോഗ്യം, വിളവെടുപ്പ്, വിപണി വിഭവ സമാഹരണം, സാങ്കേതിക സഹായങ്ങൾ തുടങ്ങിയ വിവരങ്ങൾ ശേഖരിക്കുന്നതിനും കൃഷിയുമായി ബന്ധപ്പെട്ട ഓഫീസുകളിലെ ഫ്രണ്ട് ഓഫീസ് മാനേജ്മെൻറ്, ഡാറ്റാ എൻട്രി, വിജ്ഞാന വ്യാപനം തുടങ്ങിയ മേഖലകളിൽ പരിചയം സൃഷ്ടിക്കുന്നതിനും സാധ്യമാകും.

പരിശീലന കാലയളവിൽ കൃഷിഭവൻ, ബ്ലോക്ക് തലത്തിലെ കൃഷി അസിസ്റ്റൻറ് ഡയറക്ടർ ഓഫീസ്, ജില്ലാ കൃഷി ഓഫീസ്, കൃഷി വകുപ്പ് ഫാമുകൾ എന്നിവിടങ്ങളിൽ പ്രവർത്തനങ്ങൾ മനസ്സിലാക്കുന്നതിനും സേവനങ്ങൾ നടത്തുന്നതിനും അവസരം ഉണ്ടായിരിക്കും. പരിശീലനം പൂർത്തീകരിക്കുന്നവർക്ക് സർട്ടിഫിക്കറ്റുകള്‍ നൽകും.

കൃഷി വകുപ്പിനു കീഴിലുള്ള സ്ഥാപനങ്ങളിലെ പ്രവർത്തനങ്ങൾ മനസ്സിലാക്കുന്നതിനും കാർഷിക മേഖലയിലെ സാധ്യതകൾ അറിയുന്നതിനും സന്നദ്ധ പ്രവർത്തകർക്കും മേൽ പറഞ്ഞ രീതിയിൽ അവസരങ്ങൾ ഉണ്ടായിരിക്കുന്നതാണ്. ഭക്ഷ്യ സ്വയം പര്യാപ്തത ഉറപ്പാക്കുന്നതിനുള്ള യജ്ഞത്തിൽ പങ്കെടുക്കുന്നതിനുള്ള അവസരം കൂടിയായി നമുക്കിതിനെ കാണാം.

കൂടുതല്‍ വിവരങ്ങള്‍ വരും ദിവസങ്ങളില്‍ അടുത്തുള്ള കൃഷിഭവനുകള്‍ മുഖേന ലഭിക്കുന്നതാണ്.