തണുപ്പ് കാലത്ത് വളര്‍ത്താന്‍ സൈക്ലമെൻ ചെടി

തണുപ്പ് കൂടുതലായ സീസണിൽ സജീവമായി വളർന്ന് ചുറ്റുപാടിന് നിറവും പുതുമയുമേകുന്ന ഒരു ശീതകാല അലങ്കാരപുഷ്പചെടിയാണ് സൈക്ലമെൻ (Cyclamen).  ഹൃദയാകൃതിയിലുള്ള മനോഹരമായ ഇലകളും താഴേക്ക് വളഞ്ഞ നിലയിൽ വിരിയുന്ന പുഷ്പങ്ങളും ഈ ചെടിയുടെ പ്രത്യേകതയാണ്. വീടുകളുടെയും ഓഫീസുകളുടെയും മനോഹാരിത കൂട്ടുന്ന മികച്ച ഇൻഡോർ പ്ലാന്റാണ് ഇത്.

സൈക്ലമെൻ ചെടിക്ക് ചെറുതും, ഇടത്തരം വലിപ്പമുള്ളതും, വലിയ പൂക്കൾ വരുന്ന, വളഞ്ഞ അരികുകളുള്ള (ഫ്രിൽഡ്), വെള്ള വരകളുള്ള ഇലകളോടുകൂടിയ (വാരിഗേറ്റഡ്) എന്നിങ്ങനെ നിരവധി വർഗ്ഗങ്ങളുണ്ട്. ഇവയുടെ പൂക്കൾ പിങ്ക്, വൈറ്റ്, റോസ്, പർപ്പിൾ, ചുവപ്പ് എന്നിവയുള്‍പ്പെടെ വിവിധ നിറങ്ങളിൽ ലഭിക്കുന്നു. ചില വർഗ്ഗങ്ങളിൽ പൂവിന്റെ അരികുകൾ വളഞ്ഞ രീതിയിലുള്ളതും രണ്ട് നിറങ്ങൾ ഒന്നിച്ചു കലർന്ന പൂക്കളും കാണപ്പെടുന്നു.

പ്രധാനമായും വിത്ത് (seed) ഉപയോഗിച്ചാണ് സൈക്ലമെൻ പ്രജനനം നടത്തുന്നത്. വിത്തുകൾ തണുത്ത, നേരിയ ഈർപ്പമുള്ള മണ്ണിൽ വിതയ്ക്കുമ്പോൾ 30–60 ദിവസത്തിനുള്ളിൽ മുളയ്ക്കും. പഴയ ചെടികളുടെ ട്യൂബറുകൾ വിഭജിച്ചു നട്ടും ചെടി കൂട്ടാൻ സാധിക്കും.

സൈക്ലമെൻ ചെടിക്ക് അധിക സൂര്യപ്രകാശം നേരിട്ട് തട്ടാത്ത പ്രകാശമുള്ള ഇടത്ത് വയ്ക്കുന്നതാണ് ഏറ്റവും അനുയോജ്യം. ചൂട് കൂടുന്നത് ചെടി വാടാൻ കാരണമാകുന്നതിനാൽ തണുപ്പുള്ള സ്ഥലത്ത് വെക്കണം. വെള്ളം മിതമായി മാത്രം കൊടുക്കുകയും മണ്ണിൽ നേരിയ ഈർപ്പം നിലനിർത്തുകയും വേണം. ചെടിയുടെ മദ്ധ്യത്തിലോ ഇലകളിലോ നേരിട്ട് വെള്ളം ഒഴിക്കുന്നത് ഒഴിവാക്കണം; അത് ചെടി ചീഞ്ഞുപോകാൻ കാരണമാകാം. 15 ദിവസം ഇടവിട്ട് ദ്രാവക വളം നല്‍കുന്നത് ചെടിയുടെ വളർച്ചക്കും മികച്ച പൂക്കലിനും സഹായിക്കും.

സൈക്ലമെൻ പ്രധാനമായും ശീതകാല സീസണിലാണ് (October–March) പൂക്കൾ വിരിയുന്നത്. ശരിയായ തണുപ്പും നിയന്ത്രിതമായ വെള്ളവും ലഭിച്ചാൽ ചെടി നീണ്ടകാലം പൂക്കളാൽ നിറഞ്ഞു നിൽക്കും. വേണ്ട രീതിയിൽ പരിചരിച്ചാൽ സൈക്ലമെൻ ഒരു മനോഹരവും ദീർഘകാലം നിലനിൽക്കുന്ന ഇൻഡോർ അലങ്കാരചെടിയായി മാറും.